ਕਰਤਾਰਪੁਰ ਪੰਜਾਬ ਦੈਨਿਕ ਨਿਊਜ਼ ( ਅਨਿਲ ਕੁਮਾਰ ) ਅੱਜ ਦੁਪਹਿਰ ਕਰਤਾਰਪੁਰ ਤੋਂ ਕਪੂਰਥਲਾ ਰੋਡ ਉੱਤੇ ਪਿੰਡ ਦਿੱਤੂਨੰਗਲ ਵਿਖੇ ਸੜਕ ਕਿਨਾਰੇ ਵਸੀਆਂ ਝੁੱਗੀਆਂ ਅਚਾਨਕ ਅੱਗ ਦੀ ਲਪੇਟ ਵਿੱਚ ਆਉਣ ਨਾਲ ਜਿੱਥੇ ਸੜ ਕੇ ਸੁਆਹ ਹੋ ਗਈਆਂ।ਉੱਥੇ ਇਸ ਅੱਗ ਨੇ 40 ਮਜ਼ਦੂਰ ਪਰਿਵਾਰਾਂ ਦੇ 150 ਤੋਂ ਵੱਧ ਮੈਂਬਰਾਂ ਨੂੰ ਘਰੋਂ ਬੇਘਰ ਕਰ ਦਿੱਤਾ, ਝੁੱਗੀਆਂ ਸਮੇਤ ਝੁੱਗੀਆਂ ਵਿੱਚ ਪਈ ਕਈ ਕੁਵਿੰਟਲ ਕਣਕ ਚਾਵਲ,ਮੱਕੀ ਤੇ ਹੋਰ ਰਾਸ਼ਨ,ਲੀੜਾ ਕੱਪੜਾ, ਭਾਂਡਾ-ਠੀਕਰ,ਨਗਦ ਹਜ਼ਾਰਾਂ ਰੂਪੈ,35 ਦੇ ਕਰੀਬ ਸੋਲਰ, ਬੈਟਰੀਆਂ,ਅਨੇਕਾਂ ਸਿਲਾਈ ਮਸ਼ੀਨਾਂ 9 ਸਾਇਕਲ,ਦੋ ਮੋਟਰਸਾਇਕਲਾਂ ਅਤੇ ਹੋਰ ਜ਼ਰੂਰੀ ਕਾਗਜ਼ਾਤ ਮਿੰਟਾਂ ਸਕਿੰਟਾਂ ਵਿੱਚ ਹੀ ਸੜ ਗਏ।ਸੜ ਚੁੱਕੇ ਘਰਾਂ ਚੋਂ ਮਜ਼ਬੂਰ ਮਜ਼ਦੂਰ ਪਰਿਵਾਰ ਕੁੱਝ ਨਾ ਕੁੱਝ ਬਚੇ ਖੁਚੇ ਦੀ ਤਲਾਸ਼ ਕਰਦੇ ਨਜ਼ਰ ਆਏ।
ਪੇਂਡੂ ਮਜ਼ਦੂਰ ਯੂਨੀਅਨ ਪੰਜਾਬ ਦੇ ਸੂਬਾ ਪ੍ਰੈੱਸ ਸਕੱਤਰ ਕਸ਼ਮੀਰ ਸਿੰਘ ਘੁੱਗਸ਼ੋਰ ਨੇ ਦੱਸਿਆ ਕਿ ਖ਼ਬਰ ਮਿਲਣ ਸਾਰ ਹੀ ਉਹਨਾਂ ਵਲੋਂ ਪ੍ਰਸ਼ਾਸਨ ਦੇ ਧਿਆਨ ਵਿੱਚ ਲਿਆਉਣ ਉੱਤੇ ਮੌਕੇ ਉੱਤੇ ਨਾਇਬ ਤਹਿਸੀਲਦਾਰ ਕਰਤਾਰਪੁਰ ਅਤੇ ਸਥਾਨਕ ਪੁਲਿਸ ਵਲੋਂ ਪੁੱਜ ਕੇ ਰਿਪੋਰਟ ਤਿਆਰ ਕੀਤੀ ਗਈ।ਅਕਸਰ ਵਾਂਗ ਹੀ ਫਾਇਰ ਬ੍ਰਿਗੇਡ ਵੱਲੋਂ ਲੇਟ ਪੁੱਜ ਕੇ ਬੁੱਝੀ ਹੋਈ ਅੱਗ ਉੱਪਰ ਪਾਣੀ ਪਾਇਆ ਗਿਆ।
ਮੌਕੇ ਉੱਤੇ ਪੀੜਤ ਮਜ਼ਦੂਰਾਂ ਅਨੰਦੀ ਸਿੰਘ, ਦਵਿੰਦਰ ਅਤੇ ਹੋਰਾਂ ਨੇ ਦੱਸਿਆ ਕਿ ਉਹ ਝੋਨੇ ਦੀ ਲਵਾਈ ਕਰਨ ਇੱਧਰ ਉੱਧਰ ਗਏ ਹੋਏ ਸਨ। ਦੁਪਹਿਰ ਵੇਲੇ ਖ਼ਬਰ ਮਿਲੀ ਕਿ ਝੁੱਗੀਆਂ ਨੂੰ ਅੱਗ ਲੱਗ ਗਈ ਹੈ ਤਾਂ ਉਹ ਮੌਕੇ ਪਰ ਆਏ।ਅੱਗ ਕਿਵੇਂ ਲੱਗੀ,ਇਹ ਬੁਝਾਰਤ ਬਣੀ ਹੋਈ ਹੈ।ਕੁੱਝ ਨੇੜੇ ਦੇ ਲੋਕਾਂ ਨੇ ਬੜੀ ਹਿੰਮਤ ਜੁਟਾ ਕੇ ਚਾਰ ਨਾਬਾਲਗ ਬੱਚਿਆ ਨੂੰ ਸੁਰੱਖਿਅਤ ਬਾਹਰ ਕੱਢਿਆ। ਪੇਂਡੂ ਮਜ਼ਦੂਰ ਯੂਨੀਅਨ ਪੰਜਾਬ ਦੇ ਸੂਬਾ ਪ੍ਰੈੱਸ ਸਕੱਤਰ ਕਸ਼ਮੀਰ ਸਿੰਘ ਘੁੱਗਸ਼ੋਰ ਨੇ ਮੌਕੇ ਉੱਤੇ ਪੁੱਜ ਕੇ ਪੀੜਤ ਮਜ਼ਦੂਰਾਂ ਨਾਲ ਦੁੱਖ ਪ੍ਰਗਟਾਇਆ। ਉਨ੍ਹਾਂ ਕਿਹਾ ਕਿ 75 ਸਾਲਾਂ ਦੀ ਕਥਿਤ ਅਜ਼ਾਦੀ ਦੇ ਬਾਅਦ ਵੀ ਸਮੇਂ ਦੀਆਂ ਸਰਕਾਰਾਂ ਰੋਟੀ,ਕੱਪੜਾ ਅਤੇ ਮਕਾਨ ਸਮੇਤ ਪੀਣ ਵਾਲਾ ਸਾਫ ਪਾਣੀ ਅਤੇ ਸਿਹਤ ਸਹੂਲਤਾਂ ਵਰਗੀਆਂ ਬੁਨਿਆਦੀ ਲੋੜਾਂ ਤੱਕ ਆਮ ਲੋਕਾਂ ਨੂੰ ਮੁਹੱਈਆ ਨਹੀਂ ਕਰਵਾ ਸਕੀਆਂ।ਬੇਘਰੇ ਅਤੇ ਬੇਜ਼ਮੀਨੇ ਕਿਰਤੀ ਲੋਕ ਝੁੱਗੀ ਝੌਪੜੀਆਂ ਵਿੱਚ ਦਿਨ ਕਟੀ ਕਰਨ ਲਈ ਮਜ਼ਬੂਰ ਹਨ।
ਉਨ੍ਹਾਂ ਮੰਗ ਕੀਤੀ ਕਿ ਮਜ਼ਦੂਰਾਂ ਦੇ ਮੁੜ ਵਸੇਬੇ ਦਾ ਤੁਰੰਤ ਪ੍ਰਬੰਧ ਕਰਦੇ ਹੋਏ ਢੁੱਕਵਾਂ ਮੁਆਵਜ਼ਾ ਦਿੱਤਾ ਜਾਵੇ ਅਤੇ ਬੇਘਰੇ ਤੇ ਬੇਜ਼ਮੀਨੇ ਕਿਰਤੀ ਲੋਕਾਂ ਨੂੰ ਰਿਹਾਇਸ਼ੀ ਪਲਾਟ ਤੇ ਪੱਕੇ ਮਕਾਨ ਉਸਾਰ ਕੇ ਦਿੱਤੇ ਜਾਣ ਅਤੇ ਲੱਗੀ ਅੱਗ ਦੀ ਜਾਂਚ ਕੀਤੀ ਜਾਵੇ ਕਿ ਇਸ ਪਿੱਛੇ ਕਿੱਧਰੇ ਕਿਸੇ ਸ਼ਰਾਰਤੀ ਅਨਸਰ ਦੀ ਸ਼ਰਾਰਤ ਤਾਂ ਨਹੀਂ ਸੀ
